അന്ന് നടനും സംവിധായകനും ചിത്രത്തിനുമുള്ള ദേശീയ പുരസ്‌കാരം ലഭിക്കേണ്ടിയിരുന്ന, അട്ടിമറി നടന്നു;ബാലചന്ദ്രമേനോന്‍

അഭിനേതാവ്, സംവിധായകൻ, തിരക്കഥാകൃത്ത്, നിർമാതാവ്, സംഗീത സംവിധായകൻ, ഗാനരചയിതാവ്, ഗായകൻ, എഡിറ്റർ, വിതരണക്കാരൻ തുടങ്ങി സിനിമയുടെ വിവിധ മേഖലകളിൽ കഴിവ തെളിയിച്ച പ്രതിഭയാണ് ബാലചന്ദ്രമേനോന്‍. ‘സമാന്തരങ്ങൾ’ എന്ന സിനിമയിലൂടെ മികച്ച നടനുള്ള ദേശീയ അവാർഡ് അദ്ദേഹം നേടിയിരുന്നു. ഇപ്പോഴിതാ സിനിമയിൽ 50 വർഷം പൂർത്തിയാകുന്ന വേളയിൽ 1997-ലെ ദേശീയ ചലച്ചിത്ര പുരസ്‌കാരത്തില്‍ തിരിമറി നടന്നുവെന്ന് ആരോപിച്ച് രംഗത്തെത്തിയിരിക്കുകയാണ് നടൻ.

മികച്ച നടന് പുറമേ, സമാന്തരങ്ങൾ സിനിമയ്ക്ക് സംവിധായകനും മികച്ച ചിത്രത്തിനുമുള്ള പുരസ്‌കാരം കൂടി ലഭിക്കേണ്ടതായിരുന്നുവെന്ന് ബാലചന്ദ്രമേനോന്‍ പറഞ്ഞു. എന്നാൽ, അവസാന നിമിഷത്തെ ഇടപെടലില്‍ മറ്റ് രണ്ട് പുരസ്‌കാരങ്ങള്‍ മാറിപ്പോയെന്നും അദ്ദേഹം പറഞ്ഞു. അന്നത്തെ ജൂറി അംഗത്തിന്റെ വീഡിയോ പ്രദര്‍ശിപ്പിച്ചുകൊണ്ടായിരുന്നു മാധ്യമങ്ങളോട് അദ്ദേഹം പ്രതികരിച്ചത്.

'അവാര്‍ഡ് നിശ്ചയം പൂര്‍ത്തിയായപ്പോള്‍ ഞാനായിരുന്നു മികച്ച നടന്‍, ഞാന്‍ മാത്രം. എന്റേതായിരുന്നു മികച്ച ഫീച്ചര്‍ ഫിലിം. ഞാനായിരുന്നു മികച്ച സംവിധായകന്‍. മൂന്ന് അവാര്‍ഡുകളും ബാലചന്ദ്രമേനോന് എന്ന് പറഞ്ഞ് തീരുമാനമാകേണ്ട സമയം വന്നപ്പോള്‍ തിരിമറി നടന്നു. അതില്‍ കേരളത്തില്‍ നിന്നുവന്നയാളുകള്‍ നന്നായി തിരിമറിച്ചിട്ടാണ്, ഈ രീതിയില്‍ മാറിപ്പോയത്', എന്നായിരുന്നു മാധ്യമങ്ങളോട് സംസാരിക്കവെ ബാലചന്ദ്രമേനോന്‍ പറഞ്ഞത്.

'സമാന്തരങ്ങളി'ലെ അഭിനയത്തിന് ബാലചന്ദ്രമേനോനും 'കളിയാട്ട'ത്തി അഭിനയത്തിന് സുരേഷ് ഗോപിയും ആ വർഷം അവാര്‍ഡ് പങ്കിടുകയായിരുന്നു. ജയരാജ് (കളിയാട്ടം) മികച്ച സംവിധായകനായും കന്നഡയില്‍നിന്നുള്ള 'തായി സാഹിബ' മികച്ച ചിത്രമായും തിരഞ്ഞെടുക്കപ്പെട്ടു.

Content Highlights:  Balachandra Menon about National Award he received for the film 'Samantharangal'